Samsung ត្រូវបានគេស្គាល់ថា គឺជាក្រុមហ៊ុនមួយ បានតែងតែបានបង្ហាញនូវមុខងារថ្មីៗជាច្រើននៅលើស្មាតហ្វូនត្រកូល Galaxy A series របស់ខ្លួន នៅមុនពេលដែលយកមកប្រើប្រាស់នៅលើស្មាតហ្វូនជាច្រើនត្រកូល Galaxy S និង Galaxy Note series។
យោងតាមការបញ្ជាក់ថ្មីៗនេះ បានអោយដឹងថា ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ នឹងប្រកាសចេញនូវស្មាតហ្វូន Galaxy A72 នៅក្នុងឆមាសទី 1 ឆ្នាំ 2021 នេះ ដែលនេះ គឺជាស្មាតហ្វូនដំបូងដែលមានកាមេរ៉ារហូតដល់ទៅ 5 គ្រាប់ ខណះដែលពេលនេះ គឺមានស្មាតហ្វូនជាច្រើនគឺមានកាមេរ៉ា 5 គ្រាប់ រួចមកហើយ ដែលភាគច្រើន គឺជាស្មាតហ្វូនរបស់ក្រុមហ៊ុន Xiaomi និង Huawei។ គួរបញ្ជាក់ថា កាមេរ៉ា 4 គ្រាប់ដំបូងបំផុតរបស់ស្មាតហ្វូន Samsung Series A គឺត្រូវបានប្រើប្រាស់នៅលើស្មាតហ្វូន Galaxy A9 (2018)។
របាយការណ៍ខាងលើនេះ នៅមិនទាន់មានការបង្ហាញអំពីព័ត៌មានលម្អិតនៃកាមេរ៉ារបស់ស្មាតហ្វូន Galaxy A72 នេះនោះទេ។ ប៉ុន្តែតាមការទម្លាយព័ត៍មានកន្លងមក បាននិយាយថា កាមេរ៉ា 5 គ្រាប់ដែលមាននៅលើស្មាតហ្វូន Galaxy A72 គឺមានការពង្រឹងទៅលើបច្ចេកវិទ្យាហ្សូមបានចំនួន 3x optical zoom ដែលប្រើប្រាស់នៅលើស្មាតហ្វូន Galaxy S20 Series។ ស្មាតហ្វូន នាពេលខាងមុខនេះ គឺជាស្មាតហ្វូនថ្នាក់កណ្តាលដំបូងបំផុតរបស់ត្រកូល Galaxy ដែលមានបច្ចេកវិទ្យាកាមេរ៉ានេះ។ ស្មាតហ្វូននេះ នឹងមានបន្ទះឈីប Qualcomm Snapdragon processor និងបច្ចេកវិទ្យា 5G connectivity ៕